محدش يقوللى اسكت

محدش يقوللى اهدا

محدش يقوللى امسك نفسك شوية

محدش يقوللى بطل قلة أدب

محدش يقوللى قص لسانك الزفر حبتين

…

سيبونى أقول اللى جوايا

مش قادر أسكت ع اللى بشوفو بيحصل ضد الشعب البحرينى

يعنى إيه قوات الدول الخليجية تخش وتحتل البحرين وتغزو وتضرب وتقتل الشعب البحرينى الأعزل ؟؟؟

وعلى أى أساس القوات الخليجية دى تستبيح لنفسها حق غزو البحرين ؟

يعنى بدل ما تقف على الحياد وتحاول تهدئة الأمور تخش كدة وتقتل فى الناس ؟؟

انا أعرف ان القوات دى تخش بعتادها وعدتها لما يكون فى غزو أجنبى

يعنى لو فرضنا ان ايران هى اللى دخلت البحرين

يبقى من المقبول والمعقول جدا ان القوات الخليجية تخش عشان تدافع وتحمى البحرين وتطرد القوات الايرانية

ونفس الحال لو أى أجنبى دخل يغزو البحرين

لكن فى الحالة بتاعتنا مفيش أى عدوان ولا غزو خارجى

ايران مدخلتش

امريكا مدخلتش

العفريت الأزرق مدخلش

طب ليه بقى القوات الخليجية هى اللى تخش ؟؟

مواطنين من أهل البحرين عاملين مظاهرات واحتجاجات وبيطالبوا بإصلاحات وتغييرات سياسية مشروعة

مواطنين معهمش سلاح ولا سكاكين ولا عصايا ولا حتى قلم رصاص

مواطنين بيقولوا سلمية سلمية

مواطنين عزل كل سلاحهم انهم يتظاهروا سلميا ويعتصموا فى الشوارع والميادين

بدل منتحاور ونتفاوض معاهم نقتلهم ؟

بدل منسمعهم نضربهم بالرصاص ؟

بدل منحميهم من البلطجية نخلى الجيوش الجليجية تفعصهم بالدبابات والمدرعات ؟

يا نهار اسود

ايه العقليات دى ؟؟؟

ايه التخلف ده ؟؟؟

ايه الاستعباد والاستبداد دا كله ؟؟؟

المفروض ان همة يخشوا للدفاع عن الشعب مش عن الحكام

لكن أقول ايه

الشعوب عندهم زى الكلاب

المهم عندهم ان الكراسى بتاعتهم متتخلعش من تحت … ومش عايز أقل أدبى أكتر من كدة

يا سادة

اذا كان حكام الخليج تآمروا ضد الشعب البحرينى لصالح الملك حمد بن عيسى

إذن فإننى وبأعلى صوتى أهتف وأقول :

حمد بن عيسى .. بااااطل

والملك عبد الله .. بااااطل

وخليفة بن زايد .. بااااطل

وصباح الأحمد .. بااااطل

والغزو الخليجى .. بااااطل

بااااطل

بااااطل