حملة الغاء الدروس الخصوصية
كتبهامدحت الخطيب المحامى ، في 7 مارس 2011 الساعة: 23:27 م
طبعا احنا خلاص بقينا فى مرحلة جديدة
مرحلة الحرية والتقدم والانفتاح
خلاص مش عايزين حد يتحكم فينا
عايزين ناخد حقنا
ومن حقنا ان احنا نتعلم بجد
نلاقى المدرسين اللى بيشرحولنا بضمير
عايزين عيالنا تتعلم فى المدارس
مش عايزينهم يتعلموا فى الشقق والبيوت عن طريق الدروس الخصوصية
يا ترى احنا اللى عايزين ننشر فكرة الدروس الخصوصية بإدينا
ولا احنا طهقانين وقرفانين من حكاية الدروس الخصوصية ومضطرين اليها ؟
اعتقد ان الدروس الخصوصية بتستنزف نسبة كبيرة من ميزانيات الأسرة المصرية
احنا عندنا حوالى 16 مليون طالب فى مراحل التعليم المختلفة قبل الجامعة
يعنى ممكن نلاقى من الكمية دى حوالى 10 مليون بيخدوا دروس خصوصية
ولو قلنا ان كل طالب بياخد مادتين فى المتوسط
وكمان لو قلنا ان متوسط المادة الواحدة 25 جنيه فى الشهر
يبئى دا معناه ان الأسرة المصرية بتصرف شهريا على الدروس الخصوصية 50 جنيه للفرد الواحد × 10 مليون طالب = 500000000 جنيه خمسمائة مليون جنيه على الاقل
طب مش دا حرام برضو
خمسمائة مليون جنيه شهريا بتروح ع الدروس الخصوصية بس !!!
طب ما إحنا أولى بالفلوس دى ياجدعان
احنا اللى بنشجع المدرسين على الدروس الخصوصية
احنا اللى بنشجعهم على عدم الشرح فى المدرسة بضمير
لازم نقف كلنا وقفة رجالة ونمنع الدروس الخصوصية
لازم نخارب ونجاهد عشان نخلى المدرسين يشرحوا بضمير
انا بقترح ان كل واحد يبطل ياخد درس خصوصى من دلوقتى
ولازم نهدد المدرسين اللى بيدوا دروس خصوصية ان احنا هنقدم شكاوى ضدهم وهنوديهم فى داهية
لازم نخلى المدرسين دول ينسوا خالص حكاية الدروس الخصوصية
لازم نعودهم انهم يهتموا بالشرح فى المدارس بضمير
العيل اللى مش فاهم ميمشيش م الحصة غير لما المدرس يعيد الدرس تانى وتالت ورابع لغاية لما العيل يفهم
احنا خلاص عايزين نحس ان المدارس دى للتعليم بجد
مش مجرد دكان او مكتب لعقد اتفاقات على الدروس الخصوصية بين الطلبة والمدرسين
بس برضو عشان نلغى الدروس الخصوصية
يبقى لازم نراعى ظروف جميع أطراف العملية التدريسية
وهنحاول نفضفض مع بعض فى لقاء اخر عشان نشوف المشاكل المختلفة ونحاول نحلها
وفى النهاية نلغى فكرة الدروس الخصوصية
ـــــــــــــــــــــــــــــــــــــــــــــــــــــــــ
التصنيفات : غير مصنف | أرسل الإدراج | دوّن الإدراج
يونيو 17th, 2011 at 17 يونيو 2011 1:47 ص
استاذ مدحت مفيش داعى للكلام الكبير دة كلة
ارجوك تفكر بشوية عقلانية الحل لو الموضوع دة ماثر على حد ميروحش ياخد درس وتشوف المدرسين فى المدارس بيشتغلو ولا لا واللى مش بيشتغل طبق علية القانون
مش محتاجة نقف وقفة رجالة ولا الكلام دة كلة
المدرس وانا واحد منهم عندى علم ولو شئت لاتخذت علية اجرا مثلة مثل تعليم القران ولا جت علىالدروس وبقت حرام من باب اولى كان القران يا استاذ مدحت وعلى العموم انا قولت لك الحل ممكت تعملة بس ياريت يكون الشجاعة اللى عند سياتك تكون بردة على الكاترة اللى مش بيشوفو شغلهم فى التامين علشان يشغلو عيادتهم دول بيتاجرو فى المرض انا بقى عايزك تقف وقفة رجالة اللى كنت هتقفها ضد الدروس وتعملها ضد الدكاترة والمحامين الى بياخدو فى القضية الالاف بل الملايين يتاجرون بحقوق الناس بياخدو شوية فلوس وياخد حقوق الغير وبالباطل يا استاذ مدحت عايزك تقف وقفة رجالة مع مهندسين الحى اللى بكام الف تعمل اى حاجة وبيشغلو مكاتبهم الاستشارية وياريت بردة تشوف المحكمة اللى كلها رشاوى وعلى فكرة انا اخى محامى بس انا احسن من الف محامى لانى اناالاستاذ وعلى فكرة كل اللى انا قولتهم بياكسبو من اتخن 10 مدرسين عايز بقى تقف وقفة رجالة بس شكلك هتقف كتير مض 5000000 لا ملاييين
يونيو 17th, 2011 at 17 يونيو 2011 1:54 ص
ياريت كل واحد يبدا بنفسة ويصلح منها قبل ما يشوف غيرة خلاص كلة تمام مفيش غير المدرسين ولا بقت لبنانة فى بق اى حد هاتى يا بية حكم شرعى بيقول الدروس حرام وانا اجيب لسياتك الف حكم ان مهنتك معظمها حرام واسال اى فقية عن وظيفة المحامى وقولة الدفاع عن المفسدين فى الارض مع علمك بانهم مذنبين يعنى انتم من الذين يسعون فى الارض فسادا لانها تتنطبق عليكم بالتبعية اشتراك فى الفعل زى ما القانون بيقول